ចូលឆ្នាំចិន៖ តើអ្នកណាខ្លះត្រូវចែក«អាំងប៉ាវ»?

«អាំង​ប៉ាវ» គឺជាស្រោមសំបុត្រក្រហមដែល​មាន​ដាក់​លុយ​នៅ​ក្នុង​នោះ ជនជាតិជនតែប្រើវាជាអំណោយ។ ជាទូទៅអ្នកដែលចែកអាំងប៉ាវ គឺ​ឪពុក​ម្ដាយ ជីដូន​ជីតា និង​សាច់​ញាតិ ឲ្យ​ដល់​កូន​ចៅ។

សម្រាប់ជនជាតិចិន​ពណ៌​ក្រហម​ជា​និមិត្ត​រូប​នៃ​ថាមពល សុភមង្គល និង​សំណាង​ល្អ។ ការ​ឲ្យ​អាំងប៉ាវ គឺ​ជា​ការ​ជូនពរ​ឲ្យ​មាន​សំណាង​ល្អ។ តាម​ពិត​ទៅ សារ​សំខាន់​នៃ​អាំងប៉ាវ គឺ​ស្ថិត​នៅ​លើ​ក្រដាស​ពណ៌​ក្រហម មិន​មែន​លុយ​ដែល​នៅ​ខាង​​ក្នុង​ទេ។

តើអ្នកណាខ្លះដែលគួតែជូនអាំងប៉ាវទៅគេ? សម្រាប់ជនជាតិជន ប្រសិន​បើ​អ្នក​ចាប់​ផ្ដើម​រក​លុយ​បាន​ហើយ នោះ​ជាពេលវេលាដែលអ្នកត្រូវចាប់ផ្ដើមបទពិសោធន៍នៃការចែកអាំងប៉ាវឲ្យគេហើយ។ ប៉ុន្តែ ចិនក៏មានទម្លាប់មួយទៀតដែរ គឺថា ប្រសិនបើអ្នកមិនទាន់រៀបការទេ អ្នកមិនចាំបាច់ចែកអាំងប៉ាវឲ្យគេនោះទេ។ ឪពុកម្ដាយ និងកុងម៉ា ពួកគាត់នឹងបន្តផ្ដល់អាំងប៉ាវឲ្យអ្នករហូត ទោះបីពេលអ្នករៀបការមានគ្រួសារហើយក្ដី ពីព្រោះនេះជានិមិត្តរូបនៃសេចក្ដីស្រលាញ់ និងការជូនពរដល់រូបអ្នក។

ការឲ្យអាំងប៉ាវនេះ មិនមែនធ្វើតែក្នុងអំឡុងបុណ្យចូលឆ្នាំថ្មីនោះទេ។ នៅក្នុងឱកាសពិសេសដទៃទៀត ដូចជា អាពាហ៍ពិពាហ៍ ពិធីទទួលសញ្ញាបត្រ ពេលក្មេងកើត ឬពេលខួបកំណើត ឬចម្រើនព្រះជន្មមនុស្សចាស់។ ការឲ្យអាំងប៉ាវ គឺជាប្រពៃណីនៃការជូនពរឲ្យអ្នកណាម្នាក់មានសំណាងល្អ និងសេចក្ដីសុខសប្បាយ៕

អត្ថបទ៖ សេង សុខឃីម